Menu Home

Rüegsau: JA zum Baukredit für das Schulhaus

Rüegsau: Ja zum Baukredit für das Schulhaus

"JA fürs Schuelhuus!"

Liebi Rüegsauer

Es isch üs es Alige, dass du bis am 23.September äs JA fürs Schuelhuus id Urne oder i Briefchaschte vor Gmeindverwaltig Rüegsau leisch! Üser jetzige Rüüm im Schuelhuus für au die coole Ching si schäbig u ab nächscht Jahr stöh ou zweni Rüüm zur Verfüegig. No meh Ching müesste dr Unterricht i provisorische Container-Zimmer bsueche.

Natürlech choschtet dä Schuelhuusbau öppis. Aber ou di jährleche Containermietine si sehr höch u d Sanierig u dr Neubou chunnt später gliich, würd auso nume verschobe u ds nächscht Mau nid billiger. Rüegsau verliert auso bime Nei meh Gäld. Ou dr Planigskredit vo 1.34 Mio. fürs aktuelle Projekt isch usgäh u müesst ohni Nutze abgschribe wärde. Es git no viu angeri Gründ für dä Schuelhuusbau. Bi Frage chasch bi de verantwortleche Persone  jederzyt nachefrage. Es git kener Gheimnis vo Site JA.

Wahrschiinlech si dir di obe beschribne Fakte klar, si si ja ir verschickte  Broschüre vom Gmeindrat ou guet formuliert. Aber: Vergiss nid abzstimme! U überzüg ou no angeri Rüegsauer für nes JA. Mir bruuche jedi Stimm! D Gägnerschaft mobilisiert sehr aktiv - ou über Medie u Flyer. Bir Urneabstimmig zum Planigskredit 2017 ischs mitere Stimmbeteiligung vo 26.6% u ämene JA vo 54.4% sehr knapp worde. Viu Befürworter si nid ga abstimme. Das söll nid nomau passiere.

Jedes JA für üser Ching - wo ja säuber kei politischi Stimm hei - isch ungloublech wärtvoll u für d Zuekunft sehr wichtig! Danke für dis JA!